MFi 蘋果認證有咩咁巴閉？各品牌申請MFi背後辛酸有誰知

MFi - Made For iPhone / iPad / iPod 認證（以下簡稱為MFi) 為蘋果公司(以下簡稱為Apple ) 向各生產Apple配件之品牌發放之認證。所有MFi 產品均有一粒微細晶片，當連接Apple 產品時會通過其晶片確認，確保其質量通過Apple 測試，不會導致過熱以致損壞閣下既Apple 產品。MFi認證產品亦能避免升級後不能充電或不能與電腦同步的情況出現。

呢張圖應該好多用家都見過吧。。。

貴價有原因

品牌如果希望建立長遠利益效果，必然會選擇取得MFi 認證，以得到Apple Fans 既支持。MFi 認證必需每一款產品獨立申請，並非如坊間一般認證公司只需得到一次認證後就可無限使用。每次申請均需要送交樣本給予批核，等待批核時間及手續需時，同時最重要是每個MFi均需要交"申請費"，其申請費非常"重皮"，有MFi 既產品一定會印於盒上（咁貴買返黎仲唔用到盡？）；大家可留意一下印有MFi 認證既產品均會比較同類產品貴 2 至 3 成，因為成本已經貴左一截，唯有賣價填補。所以幾時都話Apple 最CAP水。。。。

平價配件當道品牌MFi難捱

市面上充斥各式各樣配件，當中以Cable 同尿袋最為普遍，畢竟冇電冇朋友，必然一電一線旁身。iPhone 線價錢由$16到$300都有，差距極大，星斗市民搵食艱難，真係賤物鬥窮人，要幾平有幾平。現時盛行既 "執粒倉" 等十幾廿蚊一條iPhone 線, 冇MFi 之外，安全性更加成疑。然而賣者強調壞左買條新，一句 " $16蚊買個飯盒都唔得啦！" 得到大眾街坊熱烈支持。試問當大家買過$16蚊既線，莫講話$100既MFi，$50己經覺得貴幾倍，品牌點會有客路。其實品牌要俾幾倍成本去拎MFi ，然後眼見市民認為充到便是王，水流別人田，實在難受難捱。

支持正版少用雜嘜

其實MFi 只係其中一樣大家要留意既事項，始終一分錢一分貨，正式品牌均有保修期，雖然大眾覺得線／尿袋等均為消耗品，然而保修期內換新等於成本減半（一般線材／尿袋保修均為換新貨，維修成本太高），同時支持品牌亦都等於支持正版貨，人都自豪啲既。